الحرمان

احساس بالحرمان متملكني ومسيطر عليا بالرغم من نعم ربنا اللي مغرقة الواحد
واكتشفت اني مش لوحدي بحس بالاحساس ده.
على فكرة انا مش بتكلم عن الحرمان المادي اكل وشرب ولبس وفلوس
ولو انه الحرمان من الحاجات دي شيء مش سهل ابدا ولا هين.
تخيل نفسك صاحي من النوم مش عارف تأكل عيالك ايه
ولو فيهم حد عيان مش عارف تعالجه ازاي
او مش لاقي تجيب لهم لبس يسترهم او غطا يدفيهم في البرد القارص ده
تخيل ان في ناس اصلا مش لاقية مكان تعيش فيه ولادها واللي متكوم هو ولاده تحت كوبري ولا في زقاق ولا على الرصيف
وللاسف منهم كتيرررررررررر قووووووووووي في اهل الزمن ده
مهما تعاطفت او شعرت بالاسى تجاهم وتأثرت بحالهم عمرك ما هتحس بيهم لانك معشتش حرمانهم وقهرهم
الحمد لله كما ينبغى لجلال وجهه وعظيم سلطانه
الحمد لله اللي سترها معانا وعيشنا مستورين ومغمورين بنعمه
وفي ناس محرومة من الحب والود والمشاعر مفتقداه في اهلها وزمايلها وجيرانها
تحسي كده ان حياتهم مليانه قسوة وجفاء حتى من اقرب الناس ليهم
والحمد لله برده مش هو ده الحرمان اللي اقصده
انتم عارفين مع ازدياد المسئوليات وكثرة اعباء الحياة بدأالواحد ينغمس في الدنيا قوي
ويحس قوي بمشاكل الدنيا ويعيشها بعقله واحساسه وكيانه كله
وبدأ تفكيره في الآخرة يقل بدأ احساسه بالآخرة بالحساب بالجنة بالنار يقل ويقل

وابتدت العبادات تتأثر وبدل ماتكون مصدر للطمأنينة والراحة النفسية تحولت لعبء او مجرد طقوس خالية من اي روح الواحد بيأديها ليسقط الفريضة او ليسكت ضميره  ويحسس نفسه انه لسه في صله بينه وبين رينا

وحشني قوي الاحساس بالدعاء
وحشني قوي القرآن
حاجات كتير اتحرمت منها وحشتني جدا
جدا
حاسة اني غرقانة في بحر من الحرمان

عارفين احساس التلميذ اللي بيبقى حافظ التجربة اللي في درس العلوم صم زي اسمه بس مش عارف يعملها

او عارف قوانين الرياضيات زي اسمه بس مش عارف يحل المسائل

اهو ده احساسي بالضبط
عارفة ان نهاية الحرمان في القرب من ربنا بس ماعدتش عارفة ازاي

نفسي احس بربنا قوي
واشوفه في حياتي

ادعو لي ربنا يهديني ويقر عيني بقربي منه
وينور بصيرتي وقلبي بنور الايمان

تعلمت.....من اصدقاء الدراسة

احساس صعب
لما تكتشف انك اصبحت نسخة من صفات وتصرفات كنت بتنتقدها وبتهاجمها وبتقول استحالة لو اتحطيت في المواقف دي هتصرف كده
من كام يوم قابلت ناس كانوا زمايل ليا من أيام المدرسة افتكروني وقالوا لي كلام مؤثر جدا
ازاي ننساكي ده انتي كنتي من الشخصيات المؤثرة جدا واللي بتسيب بصمة في الذاكرة
ازاي ننسى كذا وكذا .....
الكلام وجعني جدا
رجعت بذاكرتي لوارا وقعدت افتكر نفسي أيام زمان لاقت نفسي وحشاني قوي
حسيت ان بقيت انسانة مختلفة عن زمان
بس للاسف الاختلاف ده ما كنش للاحسن
مش حباني بالصورة اللي انا عليها دلوقتي
اللطيف بقى ان زمااان ما كنتش معجبة بنفسي يعني ولا حاجة
وياما صدعت أمي بحوارات على غرار اني مش لاقية نفسي وحاسة اني انسانة فاشلة ومقصرة وماليش لازمة في الحياة
لكن كلامهم لفت نظري وعلمني درس مهم جدا.
مش لازم اكون عالم فذ ولا داعية محنك او مبدع مالوش مثيل او مفكر عبقري او او حاجة كده زي سوبر مان علشان يكون ليا أثر وبصمة في اللي حواليا
اخلاقيات وتصرفات الانسان ممكن تكون لها اثر اكبر وابلغ من خطب الدعاة
اجتهاده واخذه بالاسباب في شغله ممكن يكون سبب في تغير ولو بسيط في نظام المكان اكثر من برامج التنمية البشرية اللي ماليا القنوات
حتى ابتسامته وبشاشته تدي جرعة تفاؤل للناس اللي حواليه
القدرات والمواهب الفذة بتبقى هبة من عند ربنا لمجموعة من البشرية قد يصادف ان الواحد يكون منهم وممكن ما يكونش
بس مهما كانت قدرات الواحد او امكانياته ممكن يسب اثر طيب في اللي حواليه ويبقى له بصمة مؤثرة لو بدأبنفسه وعاش حياته صح بما يرضي الله واصبح قدوة لغيره
اعتقد اني محتاجة للرضا بامكانياتي والواقعية في طموحاتي
يمكن ساعتها ارتاح واتصالح مع نفسي وأفاجئ نفسي بانجازات ماكنتش متوقعاها.....تفتكروا ممكن؟!!

يتملكني هذه الايام شعور قوي بالحيرة والتخبط والاحساس بالضياع
تائهة وسط افكار متناقضة وذكريات ضائعة واحلام مبعثرة صارت بعيدة المنال
وسط هذه الفوضى جاءت هذه المدونة لتساعدني على لملمة شتات نفسي والبحث عن ذاتي في دروب الحياة
انها تدوينات حائرة تبحث عن النور وسط الظلام

ارجو ان تصل بي الى بر الأمان